മെൽബൺ സെന്റ് മേരിസ് ക്നാനായ മിഷനിൽ ഇടവക ദിനവും കൂടാരയോഗ വാർഷികവും ക്നാനായ തനിമയിൽ പ്രൗഢഗംഭീരമായി ആഘോഷിച്ചു. ആഗസ്റ്റ് 5 ശനിയാഴ്ച ഉച്ചക്ക് 2 മണിക്ക് പാലക്കാട്ട് ജെഫ്റി മെമ്മോറിയൽ സോക്കർ ടൂർണമെന്റോടുകൂടി സെന്റ് പീറ്റേഴ്സ് ചർച് ക്ലെയിറ്റനിൽ ആരംഭിച്ച ആഘോഷം പുരാതനപ്പാട്ടും നടവിളി മത്സരവും കലാപരിപാടികളുമായി വൈകിട്ട് 9 മണിക്ക് അവസാനിച്ചു.
കൂടാരയോഗങ്ങൾ തമ്മിൽ നടത്തിയ മത്സരങ്ങളിൽ സോക്കർ ടൂർണമെന്റിൽ ഒന്നാം സമ്മാനമായ പാലക്കാട്ട് ജെഫ്രി മെമ്മോറിയൽ ട്രോഫിയും $ 201 കരസ്ഥമാക്കിയത് നസ്രത് കൂടാരയോഗവും രണ്ടാം സമ്മാനമായ പാലക്കാട്ട് ജെഫ്രി മെമ്മോറിയൽ ട്രോഫിയും $101 കരസ്ഥമാക്കിയത് ബെത്ലഹേം കൂടാരയോഗവുമാണ്. കഴിഞ്ഞ വർഷത്തെ വിജയികളായ കാൽവരി, സെഹിയോൻ കൂടാരയോഗങ്ങൾ വളരെയധികം വാശിയേറിയ മത്സരമാണ് ഇക്കുറിയും കാഴ്ചവെച്ചത്.
പിന്നീട് നടത്തപ്പെട്ട അത്യന്തം വാശിയേറിയ പൗവ്വത്തിൽ ജോസഫ് മെമ്മോറിയൽ നടവിളി മത്സരത്തിൽ ബെത്ലഹേം നസ്രത് കൂടാരയോഗങ്ങൾ ഒന്നും രണ്ടും സ്ഥാനങ്ങൾ കരസ്ഥമാക്കുകയും പുരാതനപ്പാട്ട് മത്സരത്തിൽ നസ്രത് ബെത്ലഹേം കൂടാരയോഗങ്ങൾ ഒന്നും രണ്ടും സ്ഥാനങ്ങൾ കരസ്ഥമാക്കുകയും ചെയ്തു.
കുട്ടികളുടെ വിവിധ കലാപരിപാടികളും ആഘോഷങ്ങൾക്ക് മാറ്റുകൂട്ടി. കൈക്കാരന്മാരായ കുരിയൻ ചാക്കോ, ജിജോ മറികവീട്ടിൽ, സെക്രട്ടറി ബൈജു ഓണിശ്ശേരിൽ, കൂടാരയോഗ പ്രതിനിധികൾ, പാരിഷ് കൗൺസിൽ അംഗങ്ങൾ എന്നിവർ പരിപാടികൾക്ക് നേതൃത്വം നൽകി.